इटहरी । नेपाली कांग्रेसको विशेष महाधिवेशनबाट निर्वाचित नयाँ केन्द्रीय समितिमा कोशी प्रदेशबाट तीन पदाधिकारीसहित २१ जना केन्द्रीय सदस्य चयन भएका छन्। गगनकुमार थापाको नेतृत्वमा बनेको नयाँ कार्यसमितिमा कोशी प्रदेशको उल्लेखनीय उपस्थिति देखिएको छ, जसले पार्टीभित्रको शक्ति सन्तुलन र नेतृत्व संरचनामा आएको परिवर्तनलाई स्पष्ट संकेत गरेको छ।
कोशी प्रदेशबाट उपसभापति, महामन्त्री र सहमहामन्त्री गरी तीन पदाधिकारी अटाउनु केवल संख्यात्मक उपलब्धि मात्र होइन, गगन थापाको नेतृत्वप्रति प्रदेशस्तरबाट प्राप्त व्यापक राजनीतिक समर्थनको द्योतक पनि हो।
पदाधिकारी तहमा कोशीको प्रभाव
नयाँ कार्यसमितिमा झापाका विश्वप्रकाश शर्मा उपसभापति बनेका छन्। यसअघिको कार्यसमितिमा महामन्त्री रहेका शर्मा संगठनात्मक अनुभव र वैचारिक स्पष्टताका कारण प्रभावशाली पात्रका रूपमा परिचित छन्।
मोरङका गुरुराज घिमिरे महामन्त्री चयन भएका छन्। यसअघि कोशी प्रदेश सभापतिमा पराजित भए पनि उनले पार्टीभित्र निरन्तर सक्रियता र संगठन निर्माणमा देखाएको भूमिकाको परिणामस्वरूप केन्द्रीय तहमा महत्वपूर्ण जिम्मेवारी पाएका छन्।
त्यसैगरी डा. डिला सङ्ग्रौला पन्त सहमहामन्त्री बनेकी छन्। उनी यसअघि केन्द्रीय सदस्य थिइन् र महिला नेतृत्वका रूपमा पार्टीभित्र सशक्त उपस्थिति जनाउँदै आएकी थिइन्।
नयाँ अनुहारहरूको बहुमत
विशेष महाधिवेशनमा कोशी प्रदेशबाट निर्वाचित अधिकांश केन्द्रीय सदस्य नयाँ अनुहार हुन्। अघिल्लो केन्द्रीय समितिका धेरै सदस्यहरूले विशेष महाधिवेशन पक्षलाई साथ नदिएकाले नयाँ पुस्ता र फरक पृष्ठभूमिका नेताहरू अघि बढेका छन्।
मोरङका अमृत अर्याल भने यसअघि पनि केन्द्रीय सदस्य रहेका र पुनः चयन हुने सीमित पुराना अनुहारमध्ये एक हुन्। लामो समय संस्थापन पक्षमा रहे पनि पछिल्लो समय गगन थापा समूहमा खुलेका अर्याल हाल कोशी प्रदेशसभाका सदस्य हुन्। नयाँ समितिमा उनी बाहेक अन्य कोही पनि बहालवाला जनप्रतिनिधि छैनन्, जसले संगठन र सरकारबीच स्पष्ट भूमिकागत विभाजनको संकेत गर्छ।
जिल्लागत प्रतिनिधित्व
मोरङ जिल्लाबाट सबैभन्दा धेरै नेताहरू केन्द्रीय समितिमा पुगेका छन्। महामन्त्री घिमिरे र सहमहामन्त्री सङ्ग्रौलासहित शारदा देवी कोइराला, अञ्जन पौडेल, शिवनारायण सिंह गनगाई, इन्दिरा कार्की, र विश्वनाथ रिजाल केन्द्रीय सदस्य बनेका छन्।
झापाबाट उपसभापति शर्मासँगै सुधीर सिवाकोटी केन्द्रीय सदस्य निर्वाचित भएका छन्। पाँचथरबाट सुरेशकुमार योड्या र आदिवासी जनजाति क्लस्टरबाट नरेन्द्र केरुङ, उदयपुरबाट विदुर बस्नेत र प्रमिला राई, सुनसरीबाट दिलकुमारी राई, गोमा अन्सारी र नवोदिता चौधरी, इलामबाट हिमालय कर्माचार्य, सङ्खुवासभाबाट तारामान गुरुङ, धनकुटाबाट लीलादेवी बोखिम लिम्बू, तथा ओखलढुंगाबाट बाला अधिकारी केन्द्रीय समितिमा चयन भएका छन्।
विश्लेषण: गगन काँग्रेसमा कोशीको रणनीतिक जित
विशेष महाधिवेशनमा कोशी प्रदेशबाट ४२५ जना महाधिवेशन प्रतिनिधिहरूको सहभागिता थियो। यही बलियो उपस्थितिको परिणामस्वरूप प्रदेशले केन्द्रीय नेतृत्वमा निर्णायक भूमिका सुरक्षित गर्न सफल भएको देखिन्छ।
नयाँ केन्द्रीय समितिमा देखिएको भौगोलिक, लैङ्गिक र क्लस्टरगत सन्तुलनले गगन थापाको नेतृत्व समावेशी र संगठन केन्द्रित रहेको सन्देश दिएको छ। साथै, पुराना गुटगत सीमाभन्दा बाहिर निस्कँदै नयाँ गठबन्धन र राजनीतिक पुनर्संरचनातर्फ कांग्रेस अघि बढेको संकेत पनि यही संरचनाले गर्छ।
समग्रमा, कोशी प्रदेश गगन नेतृत्वको काँग्रेसमा केवल सहभागी मात्र होइन, अब निर्णायक शक्ति केन्द्रका रूपमा उदाएको छ
