इटहरी / अविरल वर्षाका कारण सप्तकोशी नदीको पानीको स्तर तीव्र गतिमा बढ्दै गएपछि आइतबार बिहान कोशी ब्यारेजका ५६ मध्ये ५० वटा ढोका खोलिएका छन्।
ब्यारेज नियन्त्रण कक्षका अनुसार बिहान ८ बजेसम्म ३,३०,३६० क्युसेक पानीको बहाव मापन गरिएको छ, जुन खतराको उच्च स्तर मा पुगेको सूचक हो।
सुनसरीका प्रमुख जिल्ला अधिकारी धर्मेन्द्र मिश्रका अनुसार पानीको बहाव लगातार बढिरहेको छ, र तटीय क्षेत्रका स्थानीय बासिन्दालाई सतर्क रहन आग्रह गरिएको छ। “नदी नजिक बसोबास गर्नेहरूले सुरक्षित स्थानतर्फ सर्ने तयारी गर्नुपर्ने अवस्था आएको छ,”
कोशी ब्यारेजका इन्जिनियरहरूले पनि आवश्यकताअनुसार थप ढोका खोल्ने तयारी भइरहेको बताएका छन्। पानीको तीव्र बहावका कारण कोशी टप्पु, बराह क्षेत्र, पश्चिम कुशाहा र बेलका आसपासका क्षेत्र उच्च जोखिममा परेका छन्।
प्रशासन, नेपाली सेना, सशस्त्र प्रहरी र स्थानीय उद्धार टोलीलाई तयारी अवस्थामा राखिएको जनाइएको छ।
सप्तकोशी नदीलाई नेपालकै “दुःखद नदी” का रूपमा चिनिन्छ । हरेक वर्ष मनसुनमा नदीको बहाव बढ्दा तराईका दर्जनौं बस्ती डुबानमा पर्ने गरेका छन् । यस वर्ष पनि कोशी नदीको तीव्र बहावले पूर्वी तराईका जिल्लामा चिन्ता बढाएको छ ।
