इटहरी , अब सवारी चालक अनुमतिपत्र (ड्राइभिङ लाइसेन्स)को अवधि ५ वर्ष होइन, १० वर्ष हुने भएको छ। साथै, नवीकरणको समयसीमा पनि ५ वर्षबाट १० वर्षमा विस्तार गरिएको छ।
आइतबार प्रतिनिधि सभाले ‘केही नेपाल ऐनलाई संशोधन गर्न बनेको विधेयक’ पारित गर्दै ‘सवारी तथा यातायात व्यवस्था ऐन, २०४९’ का दुई महत्त्वपूर्ण धाराहरू संशोधन गरेको हो। यससँगै एकैपटक ७९ वटा पुराना ऐनहरूमा पनि सुधार गरिएको छ।
के परिवर्तन भयो?
- दफा ५४(३):
पहिले ड्राइभिङ लाइसेन्स ५ वर्षका लागि जारी हुने व्यवस्था थियो। अबदेखि १० वर्षका लागि जारी हुनेछ। - दफा ५६(३):
पहिले हरेक ५/५ वर्षमा लाइसेन्स नवीकरण गर्नुपर्ने व्यवस्था थियो। अबदेखि १०/१० वर्षमा मात्र नवीकरण गर्नुपर्नेछ।
यसले चालकहरूलाई बारम्बार लाइसेन्स नवीकरण गर्नुपर्ने झन्झटबाट मुक्ति दिलाउनेछ। यद्यपि, लाइसेन्सको म्याद सकिएको ३ महिनाभित्र अनिवार्य रूपमा नवीकरण गर्नुपर्ने प्रावधान यथावत् रहनेछ।
डिजिटल प्रणाली र अभिलेख व्यवस्थापन
नयाँ संशोधनले सवारी तथा यातायात प्रणालीलाई सूचना प्रविधिमैत्री बनाउने व्यवस्था पनि गरेको छ।
- एकीकृत विद्युतीय अभिलेख प्रणाली निर्माण गरिनेछ, जसमा:
- चालक अनुमतिपत्र
- सवारी दर्ता विवरण
- राजस्व अभिलेख
- जैविक विवरण (Biometrics) समावेश हुनेछ।
यी सबै विवरण सूचना प्रविधिमा आधारित ढाँचामा अनलाइन प्रणालीमा दर्ता गर्नुपर्नेछ। विभागले तोकेको ढाँचाअनुसार मात्र विवरण प्रविष्टि गर्न पाइनेछ।
कार्यान्वयन कहिलेदेखि?
यो विधेयक असार १७ गते राष्ट्रिय सभाबाट पारित भइसकेको हो। आज प्रतिनिधि सभाबाट समेत पारित भएपछि अब राष्ट्रपति रामचन्द्र पौडेलको प्रमाणीकरण पछि राजपत्रमा प्रकाशन भएपछि कार्यान्वयनमा आउनेछ।
