इटहरी / सप्तरी जिल्लाको कञ्चनरूप नगरपालिका–१२ मा शनिबार राति जङ्गली हात्तीको आक्रमणमा परी एक जनाको मृत्यु भएको छ। ६६ वर्षीय केदार बहादुर विष्ट (दशरथ) आफ्नै मकैबारीमा ज्यान गुमाएका हुन्।
स्थानीय स्रोतका अनुसार विष्ट आफ्ना बाली जङ्गली जनावर — विशेषगरी बँदेल — बाट जोगाउन बारीमै बसेका थिए। राति करिब १ बजे पश्चिमतर्फको जंगलबाट आएको हात्तीको समूहमध्ये एक हातिले विष्टमाथि आक्रमण गरेको हो। प्रत्यक्षदर्शीहरू भन्छन्, हात्तीको दाह्रा विष्टको शरीरमा गाडिएको थियो, जसले घटनास्थलमै उनको ज्यान गयो।
हात्तीको गतिविधि विगत केही दिनदेखि नै देखिँदै आएको भए पनि यसरी मानव ज्यान लिने घटना भने यो पहिलो हो। स्थानीयहरू त्रसित भएका छन् र वन विभागसँग तत्काल नियन्त्रणका लागि आग्रह गरेका छन्।
सप्तरीमा यो सिजनमा मकै पाक्ने समय भएकोले किसानहरू रातरातभर बाली बचाउन बारीमा नै बसेका हुन्छन्। तर वन क्षेत्र नजिक रहेका गाउँहरूमा जङ्गली जनावरको आतंक लगातार बढ्दो छ, जसले किसानहरूको सुरक्षामा ठूलो प्रश्न उठाएको छ।
प्रहरी र वन कार्यालयका अधिकारीहरूले घटनास्थल पुगेर मुचुल्का उठाएका छन् र हात्ती नियन्त्रण तथा विस्थापनका उपायमा छलफल भइरहेको जनाएका छन्। मृतक विष्टको परिवार र गाउँमा शोकको वातावरण छ।
