विराटनगर — नेकपा एमाले कोशी प्रदेश समितिले ताप्लेजुङका नेता बलबहादुर साम्सोहाङ र मणिशंकर पोमुलाई निलम्बन गरेको छ। राष्ट्रिय युवा संघ नेपालको ताप्लेजुङ अधिवेशनमा संस्थापन पक्षद्वारा एकलौटी कमिटी गठनको विरोध गरेपछि उनीहरूमाथि कारबाही गरिएको हो।
प्रदेश अध्यक्ष घनश्याम खतिवडाका अनुसार ताप्लेजुङ कमिटीको सिफारिसका आधारमा निलम्बन गरिएको हो भने घटनाबारे थप छानबिनका लागि समिति गठन गरिएको छ। अधिवेशनमा विवाद चुलिएपछि तोडफोड र कुटाकुटको स्थिति पनि देखिएको थियो।
साम्सोहाङ एमालेभित्र सहमति खोज्नुपर्छ भन्ने धारणा राखेका थिए भने कारबाहीप्रति कुनै तत्काल योजना नरहेको जनाएका छन्। कारबाहीमा परेका दुवै नेता एमाले नेता योगेश भट्टराई निकट मानिन्छन्। अधिवेशनमा भट्टराई सहभागी थिएनन्।
प्रदेश कमिटीले इटहरी, दमक र काठमाडौंमा सम्पन्न कार्यक्रमहरू सफल भएको निष्कर्ष निकालेको छ भने पर्यटन वर्ष घोषणालाई समर्थन गर्ने निर्णय गरेको छ।
