विराटनगर – कोशी प्रदेशले समृद्धिको नयाँ ढोका खोल्दै २०८२ साललाई कोशी पर्यटन वर्ष घोषणा गर्दै भव्य रूपमा उद्घाटन गर्न लागेको छ। पूर्वाधार विकास, धार्मिक स्थलहरूको प्रवर्धन र अन्तर्राष्ट्रिय पर्यटक आकर्षणलाई प्राथमिकता दिँदै प्रदेश सरकारले सम्पूर्ण तयारी पूरा गरेको छ।
चैत्र २७ गते तेह्रथुमको तीनजुरे मिल्के क्षेत्रबाट प्रधानमन्त्री केपी शर्मा ओलीको प्रमुख आतिथ्यमा पर्यटन वर्षको ऐतिहासिक उद्घाटन हुने कार्यक्रम तय गरिएको छ। प्रदेशको पर्यटन प्रबर्द्धनका लागि यस अभियानलाई ‘आधारशिला’का रूपमा लिइएको छ।
मुख्यमन्त्री हिक्मत कार्कीले कोशीको अपार प्राकृतिक सौन्दर्य, सांस्कृतिक सम्पदा र धार्मिक स्थलहरूलाई समेट्दै पर्यटनबाट नै राष्ट्रिय पुँजी विकास गर्ने दाबी गरेका छन्। उहाँका अनुसार यो वर्ष प्रदेशको पर्यटकीय क्षेत्रमा दीर्घकालीन परिवर्तन ल्याउने अवसर हो।
धार्मिक पर्यटनमा पनि सम्भावना देखिएको प्रदेशमा पर्यटकलाई सहजता दिने उपायहरू समेत अपनाइएका छन्। विशेषगरी भारतबाट आउने पर्यटकलाई लक्षित गर्दै सवारी साधनमा पर्यटकीय स्टिकर लगाउने व्यवस्था गरिएको छ, जसले सीमामा अनावश्यक झन्झट कम गर्नेछ।
पर्यटन वन तथा वातावरण मन्त्री सदानन्द मण्डलको संयोजकत्वमा निर्देशन समिति गठन गरी कार्यक्रमलाई प्रभावकारी बनाइएको छ। साथसाथै काँकरभिट्टा र धरानका पर्यटन कार्यालयहरू समेत सक्रिय रूपले परिचालनमा छन्।
कोशी पर्यटन वर्ष २०८२ न केवल प्राकृतिक सौन्दर्यको खोजी हो, यो प्रदेशको आर्थिक समृद्धि, संस्कृतिको संरक्षण र वैदेशिक पर्यटकहरूसँग सम्बन्ध विस्तार गर्ने सुनौलो अवसर पनि हो।
पूर्वेली गाथा, संस्कार र प्रकृतिलाई विश्वसामु चिनाउने यो अभियान सफल होस् भन्ने कामना गरौं।
