विराटनगर । सोमबार सम्पन्न स्वतन्त्र विद्यार्थी युनियन (स्ववियु) निर्वाचनमा मोरङका विभिन्न क्याम्पसहरूबाट प्राप्त मतपरिणामअनुसार अखिल (क्रान्तिकारी) अग्रस्थानमा देखिएको छ। हालसम्म सार्वजनिक सात क्याम्पसका नतिजामध्ये चार क्याम्पसमा क्रान्तिकारीले जित दर्ता गरेको छ भने एक क्याम्पसमा नेविसंघ र दुई क्याम्पसमा अनेरास्ववियुले विजय हासिल गरेको छ।
मंगलबार सम्पन्न निर्वाचनमा मोरङका तीन आंगिक र पाँच सामुदायिक क्याम्पसमा मतदान भएको थियो। तीमध्ये केही क्याम्पसको मतगणना अझै जारी छ।
क्रान्तिकारीको दबदबा
त्रिभुवन विश्वविद्यालयका दुई आंगिक क्याम्पससहित चार क्याम्पसमा अखिल क्रान्तिकारीको नेतृत्व चयन भएको छ। विराटनगरको डिग्री क्याम्पसमा प्रीतम साहको नेतृत्वमा सम्पूर्ण प्यानल विजयी भएको छ भने नर्सिङ क्याम्पसमा रोहित ताजपुरियाको नेतृत्वमा क्रान्तिकारी विजयी भएको छ।
यसैगरी, मोरङको कानेपोखरीस्थित रमाइलो क्याम्पसमा अनिश कार्कीको अध्यक्षतामा तथा मिक्लाजुङ क्याम्पसमा सुजन घिमिरेको प्यानल निर्वाचित भएको छ।
अन्य क्याम्पसहरूको नतिजा
- केरावारीस्थित खदम क्याम्पसमा अनेरास्ववियुका सङ्गम कन्दङ्वा सभापतिमा विजयी
- सुन्दर हरैंचा स्थित सुकुना बहुमुखी क्याम्पसमा अनेरास्ववियुका एलिस ओझा निर्वाचित
- पथरी बहुमुखी क्याम्पसमा नेविसंघका केशर राईको जित
महेन्द्र मोरङ क्याम्पसमा क्रान्तिकारीको अग्रता
पूर्वी नेपालको सबैभन्दा ठूलो क्याम्पस मानिने विराटनगरस्थित महेन्द्र मोरङ क्याम्पसमा अखिल क्रान्तिकारी अग्रस्थानमा रहेको छ। पछिल्लो मतपरिणामअनुसार ८३३ मत गणना हुँदा क्रान्तिकारीका रोहित यादवले ३७६ मत प्राप्त गर्दै अग्रता लिएका छन्। उनलाई नेविसंघका उम्मेदवारले ३२८ मतसहित पछ्याइरहेका छन्।
मतगणनाको अन्तिम नतिजा आउन बाँकी रहेकोले प्रतिस्पर्धा अझै रोमाञ्चक रहने देखिन्छ।
